მიკროპლასტმასი ჰაერში

მიკროპლასტმასი – ანუ ხუთ მილიმეტრზე ნაკლები დიამეტრის მქონე პლასტმასის ნაწილაკები – არის ყველგან, მათ შორის ჰაერშიც. პლასტმასის წვრილი ნაწილაკები ქარს გადააქვს და მსოფლიოს ყველა რეგიონში გვხვდება.

აშშ – ში ჩატარდა კვლევა სხვადასხვა ტერიტორიაზე აღმოჩენილი მიკროპლასტმასის წარმომავლობისა და დაბინძურების არეალის დასადგენად.

ამ კვლევის თანახმად, ჰაერში აღმოჩენილი მიკროკლასტმასის 84 პროცენტი საგზაო ტრანსპორტს, ხოლო 5 პროცენტი სოფლის მეურნეობის ნარჩენებს მიეკუთვნება. დარჩენილი 11 პროცენტი კი დაბინძურებული ზღვებიდან ჰაერში მოხვედრილი ნარჩენებია.

სატრანსპორტო მიმოსვლით ჰაერის მიკროპლასტმასით დაბინძურებას მკვლევრები იმით განმარტავენ, რომ როგორც სამუხრუჭე ხუნდები და საბურავები, ასევე გზის საფარიც შეიცავს ხელოვნურ მასალას, რომელიც დამუხრუჭებისა და ცვეთის შედეგად ჰაერში იფანტება.

სოფლის მეურნეობაში გამოყენებული სასუქი და  ხელოვნური მულჩირების მასალაც ასევე შეიცავს მიკროპლასტმასს.

მკვლევრების აზრით, მიკროპლასტმასი ატმოსფეროში საშუალოდ 6,5 დღე ყოვნდება. ხელშემწყობი კლიმატური პირობების არსებობის შემთხვევაში შესაძლებელია ერთი კონტინენტიდან მეორეზე გადაადგილდეს.

კვლევის მიხედვით, ამერიკის დასავლეთ ნაწილში საშუალოდ 1000 ტონა მიკროპლასტმასია ატმოსფეროში.

სტატიაზე მუშაობდა : მეგი წერეთელი და ნინი თოიძე

წყარო : https://www.n-tv.de/wissen/Wie-sich-Mikroplastik-ueber-die-Luft-verteilt-article22486778.html