მეცხოველეობით დაკავებული 20 კომპანია უფრო მეტ სათბურის აირს წარმოქმნის, ვიდრე დიდი ბრიტანეთი, საფრანგეთი ან გერმანია.

• გერმანიის მწვანეთა პარტიის მიერ ყოველწლიურად გამოქვეყნებული ,,Meat Atlas” აჯამებს სამეცნიერო მონაცემებს ხორცპროდუქტების მოხმარების შესახებ, რომლის მიხედვითაც, მეცხოველეობით დაკავებული 20 კომპანია უფრო მეტ სათბურის აირს წარმოქმნის, ვიდრე დიდი ბრიტანეთი, საფრანგეთი ან გერმანია.
• მეცხოველეობის არასწორად წარმართულ პროცესს საზოგადოებრივი ჯანმრთელობისთვის რისკის შექმნა შეუძლია. კვებით ჯაჭვში ანტიბიოტიკების გადამატებით მოხმარება ადამიანებში იწვევს მიკრობულ რეზისტენტობას, რაც ანტიბიოტიკების, მედიცინაში ერთ-ერთი ყველაზე გავრცელებული მკურნალობის მეთოდის, ეფექტურობას ასუსტებს.
• ყოველწლიურად საფრანგეთში კვებითი ინდუსტრიის ნაწილი 200 მილიონი ცხოველი არა პროდუქტების წარმოების, არამედ ეკონომიკური მიზეზებითა და დაავადებებით იხოცება.                

ერთ-ერთმა უახლესმა კვლევამ ნათელი მოჰფინა იმ პრობლემებს, რომლებიც მეცხოველეობის შედეგადაა გამოწვეული. გერმანიის მწვანეთა პარტიის მიერ ყოველწლიურად გამოქვეყნებული ,,Meat Atlas” აჯამებს სამეცნიერო მონაცემებს ხორცპროდუქტების მოხმარების შესახებ. 76-გვერდიანი დოკუმენტი ადასტურებს, რომ მეცხოველეობით დაკავებული 20 კომპანია უფრო მეტ სათბურის აირს წარმოქმნის, ვიდრე დიდი ბრიტანეთი, საფრანგეთი ან გერმანია.

აგრეთვე, ხორცისა და რძის პროდუქტების მწარმოებელი 5 ყველაზე დიდი კომპანია წარმოქმნის იმდენივე სათბურის აირს, რამდენსაც ექსონი, მსოფლიოს ერთ-ერთი ყველაზე დიდი ნავთობისა და ბუნებრივი აირის კომპანია.

ნიადაგის არარაციონალური გამოყენების პრობლემა კიდევ ერთი ხაზგასმული ასპექტი იყო. კვლევის მიხედვით, სასოფლო-სამეურნეო მიწების ორი მესამედი ცხოველთა მოსაშენებლად და მათი საკვების მოსაყვანად გამოიყენება.

მეცხოველეობის არასწორად წარმართულ პროცესს საზოგადოებრივი ჯანმრთელობისთვისაც შეუძლია რისკის შექმნა. კვებით ჯაჭვში ანტიბიოტიკების გადამატებით მოხმარება ადამიანებში იწვევს მიკრობულ რეზისტენტობას, რაც ანტიბიოტიკების, მედიცინაში ერთ-ერთი ყველაზე გავრცელებული მკურნალობის მეთოდის, ეფექტურობას ასუსტებს.

ხორცპროდუქტების მოხმარების შემცირება

ბოლო 5 წლის განმავლობაში (2020 წლის ჩათვლით) მსოფლიო ხორპროდუქტებისა და რძის ნაწარმის ინდუსტრიამ 478 მილიარდი დოლარის ოდენობის დაფინანსება მიიღო 2,500 სხვადასხვა ბანკისა და საინვესტიციო ფონდისგან.

,,Meat Atlas” გვამცნობს, რომ ასეთი ფინანსური მხარდაჭერით ხორცპროდუქტების წარმოება 2029 წლისთვის შესაძლოა 40 მილიონი ტონით გაიზარდოს და ყოველწლიურმა ნიშნულმა 366 მილიონ ტონას მიაღწიოს.

თუ კვებითი ინდუსტრია და მომხმარებლის ჩვევები არ შეიცვლება, ამ პროდუქტების დიდი ნაწილი ნაგავსაყრელზე მოხვდება. მაგალითისთვის, ყოველწლიურად საფრანგეთში კვებითი ინდუსტრიის ნაწილი 200 მილიონი ცხოველი არა პროდუქტების წარმოების, არამედ ეკონომიკური მიზეზებითა და დაავადებებით იხოცება.

საბოლოო ჯამში, კვლევა მიუთითებს იმაზე, რომ ხელისუფლების მქონე პოლიტიკოსები არ იღებენ ინდუსტრიის საქმიანობის მარეგულირებელ შესაბამის ზომებს, მიუხედავად მეცხოველებით გამოწვეული აშკარა და ნათელი უარყოფითი შედეგებისა.

განვითარებულმა ქვეყნებმა უნდა შეამცირონ და საუკეთესო შემთხვევაში გაანახევრონ ხორცპროდუქტების მოხმარება ბიომრავალფეროვნებისა და კლიმატის დასაცავად. ეს პროცესი კი ჯერჯერობით სასიხარულო შედეგისკენ მიიწევს საზოგადოებრივი მხარდაჭერის შედეგად.

სტატიაზე მუშაობდა : ნინი თოიძე

წყარო : plantbasednews.org