ევროპის ქალაქებს შორის ყველაზე ცუდი ჰაერი მადრიდში და ბრეშაშია
ახალი კვლევის მიხედვით, ესპანეთის დედაქალაქ მადრიდში, აზოტის-დიოქსიდით გამოწვეული ადრეული სიკვდილიანობის მაჩვენებელი ევროპაში ყველაზე მაღალია, ხოლო იტალიის ქალაქ ბრეშაში, ჰაერის ხარისხით გამოწვეული სიკვდილიანობა, მყარი ნაწილაკების მაღალ კონცენტრაციას უკავშირდება.
კვლევის მიხედვით, რომელიც 18 იანვარს „The Lancet Planetary Health Journal“-მა გამოაქვეყნა, ევროპის მოსახლების 84% ჯანდაცვის მსოფლიო ორგანიზაციის მიერ დადგენილ ნორმაზე მაღალ დაბინძურების გარემოში ხვდებიან. ეს პირველი კვლევაა, რომელიც აფასებს ადრეული სიკვდილიანობისა და ჰაერის დაბინძურების კავშირს ევროპის ქალაქებში. ჯანდაცვის მსოფლიო ორგანიზაციის რეკომენდაციების გათვალისწინებას შეუძლია წელიწადში 52,000-მდე ადამიანის სიცოცხლე გადაარჩინოს.
საშა ხომენკოსა და სხვა მკვლევარების მიხედვით, “Barcelona Institute for Global Health”-იდან, აზოტის-დიოქსიდთან დაკავშირებული მაღალი სიკვდილიანობის მაჩვენებელი, მჭიდროდ დასახლებულ, ევროპის სამხრეთ და დასავლეთ ნაწილებში, კავშირშია მანქანების გამონაბოლქვთან.
ჰაერში, აზოტის-დიოქსიდის მაღალი კონცენტრაცია გამოწვეულია ძველი დიზელის მოდელის ავტომანქანების მიერ ჰაერის დაბინძურებით. მყარი ნაწილაკები, ანუ PM2.5 ჰაერში ხვდება ავტომობილების, საყოფაცხოვრებო წვის პროცესებისა და ინდუსტრიული აქტივობის შედეგად.
სხვადასხვა სატრანსპორტო საშუალებების ან ქარხნების ენერგიით მომარაგებისთვის, საწვავის დაწვით გამოყოფილი მყარი ნაწილაკები ადამიანის თითქმის ყველა ორგანოში ხვდება.
მრავალი კვლევა არსებობს, რომელიც ამყარებს შემდეგ მოსაზრებას: მაღალი დაბინძურების მქონე გარემოში, იზრდება გულსისხლძარღვთა დაავადებების, გულის შეტევის, ასთმის, პნევმონიისა და ფილტვის კიბოს რისკი. მკვლევარებმა ასევე აღმოაჩინეს, რომ დაბინძურებულ გარემოში კორონა ვირუსით სიკვდილის რისკი უფრო მაღალია.
სტატიაზე მუშაობდა : შაკო ღლონტი და ანა კუხაშვილი