ავსტრალია გეგმავს ეტაპობრივად აკრძალოს ერთჯერადი პარკების, საწრუპავებისა და ჭურჭლის გამოყენება 2025 წლისთვის
ავსტრალიის გარემოს ყოველწლიურად დაახლოებით 13 000 ტონა პლასტმასის ნარჩენი აბინძურებს.
ავსტრალიის ხელისუფლების წარმომადგენლები შეთანხმდნენ დღემდე არსებულ ყველაზე მრავლისმომცველ გეგმაზე პლასტმასის ერთჯერადი ნარჩენების შესამცირებლად. ავსტრალიის სხვადასხვა შტატის ნარჩენების კონტროლის კანონები საერთო ეროვნული გეგმით ჩანაცვლდება, რომლის მთავარი მიზანიც ყურადღების გამახვილებაა ერთჯერადი პლასტმასის გაყიდვის შემცირებასა და უხრწნელი პლასტმასის ბიოდეგრადირებად მასალად გასაღების აკრძალვაზე.
დარენ კინდლისაიდი, ავსტრალიის ზღვის ეკოსისტემის დაცვის საზოგადოების წარმომადგენელი, ამბობს, რომ ეს მნიშვნელოვანი ნაბიჯია ნარჩენებთან ბრძოლის კუთხით, თუმცა ჯერ კიდევ არ არის მიზნის მიღწევის ვადისა და აკრძალული ტიპის ნარჩენების გარდა სხვა დეტალები ცნობილი.
სამხრეთ ავსტრალიაში, კუინზლენდსა და კანბერაში იგეგმება 2021 წლის ბოლომდე აიკრძალოს ერთჯერადი პლასტმასი, დასავლეთ ავსტრალია და ვიქტორიას შტატი კი იმავე მიზნის მიღწევას 2023 წლისთვის აპირებს. ახალ სამხრეთ უელსს, ტასმანიასა და ჩრდილოეთის შტატებს ჯერჯერობით არ გამოუქვეყნებიათ ნარჩენებთან ბრძოლის თავიანთი გეგმები.
შტატების გარდა, ავსტრალიის მსხვილი მწარმოებლები, მათ შორის „ნაიკი“, „მაკდონალდსი“ და „ნესტლე“, უკვე მუშაობენ მათი პროდუქციის პლასტმასის შეფუთვების ბიოდეგრადირებადი და გადამუშავებადი ალტერნატივებით ჩანაცვლებაზე.
ავსტრალიაში 2019 წელს 75.8 მილიონი ტონა ნარჩენი დაგროვდა, აქედან 2.5 მილიონი ტონა პლასტმასი იყო. სამწუხაროდ, პლასტმასის მხოლოდ 9% გადამუშავდა. ყოველწლიურად სახელმწიფოში 13 000 ტონა პლასტმასის ნარჩენი წარმოიქმნება, რის გამოც, ნიუკასლის უნივერსიტეტისა და ბუნების მსოფლიო ფონდის კვლევების მიხედვით, საშუალოდ თითო ავსტრალიელის ორგანიზმში 200 მიკროპლასტმასის ნაწილი ხვდება ყოველკვირეულად.
,,პლასტმასი არა მხოლოდ აბინძურებს ჩვენს ნიადაგსა და ოკეანეებს, არამედ წამლავს ჩვენს ორგანიზმსაც“, – აცხადებს ბუნების მსოფლიო ფონდის საერთაშორისო გენერალური დირექტორი მარკო ლამბერტინი.
პლასტმასის ნარჩენების აკრძალვის რეფორმებით ავსტრალია უერთდება კანადას, ჩინეთს, საფრანგეთს, ინგლისს, რუანდასა და კენიას.
სტატიაზე მუშაობდა : ნინი თოიძე
Thank you for your sharing. I am worried that I lack creative ideas. It is your article that makes me full of hope. Thank you. But, I have a question, can you help me?