ახალი კვლევის მიხედვით მიკროპლასტმასი ჰაერს აბინძურებს
ახალი კვლევის მიხედვით, რომელიც ჟურნალ “Proceedings of the National Academy of Sciences”-ში გამოქვეყნდა, მიკროპლასტმასი ოკეანიდან ქარის მეშვეობით ხვდება ჰაერში და აბინძურებს მას.
Cornell-ის უნივერსიტეტის მკვლევრები დასავლეთ აშშ-ში 2017 წლის დეკემბრიდან 2019 წლის თებერვლამდე აგროვებდნენ მონაცემებს მიკროპლასტმასის შესახებ ჰაერში. მათ აღმოაჩინეს, რომ ამ დაბინძურების 84% საგზაო მტვრიდან ხვდებოდა ჰაერში, 11% ზღვიდან, ხოლო 5% – სასოფლო-სამეურნეო მიწის მტვრიდან. მათ კვლევაში ხაზი გაუსვეს, რომ ზღვიდან წამოსული 11% განსაკუთრებით ყურადსაღები და მაღალია.
ამ მონაცემების ანალიზის შემდეგ მათ ასევე აღმოაჩინეს, რომ ოკეანის მოძრაობა პლასტმასს ანაწევრებს მცირე ზომის ნაწილაკებად, შემდეგ კი ქარი მათ ჰაერში ფანტავს.
ინჟინერიის პროფესორი და კვლევის მთავარი ავტორი, ნატალი მაჰოვალდი კვლევის შესახებ ამბობს: „ჩვენ აღმოვაჩინეთ პლასტმასის დაბინძურების მაღალი დონე ყველგან, სადაც ჩავატარეთ კვლევები; პლასტმასი ხვდება ატმოსფეროში და შესაბამისად მთელ მსოფლიოში ვრცელდება. ეს პლასტმასი ჰაერში არ მოხვედრილა კვლევის ჩატარების წლებში, ეს მატერია ჰაერში მოხვდა წარსულში დაყრილი ნაგვიდან, იმ ნარჩენებიდან, რომლებსაც უკვე წლებია უმართავად ბუნებაში ვყრით. ჩვენ ჩავატარეთ მოდელირება დანაგვიანების წყაროების საპოვნელად. საოცარია, რომ ამდენი პლასტმასი ხვდება ატმოსფეროში ასეთ მაღალ დონეზე. მატერია გროვდება ოკეანესა და ხმელეთზე, აქედან კი ის ვრცელდება ყველგან, მათ შორის საკმაოდ მოშორებულ ადგილებზე. რეალობასთან ყველაზე ახლო მოდელირებით ჩვენ განვსაზღვრეთ, რომ ეს მატერია ძირითადად გარემოში ხვდება ქსელური კონტინენტშორისი საზღვაო იმპორტით. ეს ხაზს უსვამს მემკვიდრეობითი დაბინძურების სიმძიმეს პლასტმასის ატმოსფეროში გავრცელების კუთხით. მიკროპლასტმასი ხვდება და გროვდება ყველგან, არა მხოლოდ ქალაქებსა ან ოკეანეებში, ის გვხვდება პარკებსა და მწვანე სივრცეებშიც.“
Emissions Analytics-ის თანახმად, ამ ყველაფერთან ერთად ჰაერის დაბინძურება მანქანის საბურავების მიერ შეიძლება იყოს 1000-ჯერ უფრო ცუდი ვიდრე გამონაბოლქვის მიერ.
სტატიაზე მუშაობდა : შაკო ღლონტი და დეა კუსიანი
წყარო : irqualitynews.com